АРМИНФОЦЕНТР: С 17 по 19 октября 2014г. в Ереване пройдет 2-я сессия Национального Собрания (Парламента) Западной Армении 1-го созыва.
Հոկտեմբերի 17-ին, 18-ին եւ 19-ին Երեւանում տեղի կունենա Արեւմտյան Հայաստանի Ազգային Ժողովի (Խորհրդարանի) 2-րդ նստաշրջանը: Ինչպես նշված է ԱՀ Խորհրդարանի նախագահության տարածած մամլո հաղորդագրության մեջ, նստաշրջանում հաստատվելու են 2014-ի ընթացքում Խորհրդարանի կողմից ընդունված օրենքները, լսվելու են Արեւմտյան Հայաստանի Ազգային Ժողովի (Խորհրդարանի) եւ Արեւմտյան Հայաստանի Վտարանդի Կառավարության Վարչապետ Տիգրան Փաշաբեզյանի հաշվետվությունները կատարած աշխատանքների վերաբերյալ:
Արեւմտյան Հայաստանի Հանրապետության Նախագահ Արմենակ Աբրահամյանը հանդես է գալու քաղաքական զեկույցով «Արեւմտյան Հայաստանի Հանրապետության ռազմավարությունը Արեւմտյան Հայաստանի եւ Մերձավոր Արեւելքի հայության իրավունքների պաշտպանությունը եւ անվտանգությունը» հարցերի վերաբերյալ:
Կընդունվի հատուկ հայտարարություն Հայերի ցեղասպանության ճանաչման, դատապարտման եւ հատուցման հարցերի շուրջ Արեւմտյան Հայաստանի Հանրապետության ռազմավարության մասին, եւ քննարկումներ կծավալվեն «Արեւմտյան Հայաստանի Հանրապետության կողմից իրականացվող Արեւմտյան Հայաստանի հայերի իրավունքների պաշտպանության գործընթացը հայկական խնդիրների ենթատեքստում» թեմայով:
Տեղեկացվում է նաեւ, որ հոկտեմբերի 19-ին Կոմիտասի անվան Կամերային երաժշտության տանը տեղի կունենա բարեգործական համերգ, ցուցահանդես եւ նվիրատվության միջոցառում՝ ի աջակցություն Քեսապի ազատագրմանը մասնակցած ազատամարտիկների ընտանիքներին (ԶԼՄ-ների համար մուտքն ազատ է):
Հավելյալ տեղեկությունների համար դիմել 060-27-64-62 կամ 093-669-339 հեռախոսահամարներով՝ Մարի Պետրոսյանին:
Արեւմտյան Հայաստանի Խորհրդարանի Լրատվական ծառայություն
14.10.2014 թ.
|