АРМИНФОЦЕНТР: Ֆրանսահայ Թեմի Առաջնորդ, եւ Արեւմտեան Եւրոպայի Կաթողիկոսական Պատուիրակ, Նորվան Արք. Զաքարեանի հրաժարականը մեծ յուզում եւ վրդովում յառաջացուց ֆրանսահայ համայնքէն ներս ու անկէ անդին։ Անոր հրաժարականի գլխաւոր դրդապատճառը կը նկատուի Նիսի նախկին հոգեւոր հովիւին վարձատրութեան հարցը, Նիսի նախկին ծխական խորհուրդին հետ հնգամեայ բախումներէն եւ ֆրանսական արդարադատութեան հետ ունեցած հարցերէն ետք։ Սակայն կը թուի, թէ ատիկա հանդիսացած է բաժակը յորդեցնող կաթիլը միայն. Անոր հրաժարականին գլխաւոր պատճառը ըլլալու են այն անընդունելի ճնշումները, որոնց կ՚ենթարկուի Նորվան Սրքեպիսկոպոս՝ էջմիածնի Մայր Աթոռին կողմէ: Նորվան Արքեպիսկոպոսը մտաւորական բարձր կարողութիւններու տէր, սիրուած ու գնահատուած անձնաւորութիւն մըն է համայնքիս մէջ ու յարգանքը կը վայելէ անդրհամայնքային թէ՛ հոգեւոր, թէ՛ ալ աշխարհական շրջանակներուն։ Ան կը փորձէ իր լաւագոյնը ընել ներդաշնակելու համար Հայց. Առաքելական եկեղեցւոյ ներքին կանոնները՝ տեղական ժողովրդավար օրէնքներուն եւ չափանիշներուն հետ։ Որքան ալ յարգելի ըլլան Ամենայն Հայոց Կաթողիկոսին հետապնդած եկեղեցական ու այլ նպատակները, ընդունելի ու արդար չէ նսեմացնել ու վարկաբեկել Հայ Եկեղեցւոյ պարկեշտ ու կարեւոր ներկայացուցիչ մը՝ յանձինս Նորվան Արք. Զաքարեանին։ Հայկական Վերածնունդի Փարիզի մասնաճիւղը իր նեցուկը կը յայտնէ Նորվան Արքեպիսկոպոսին եւ կոչ կ’ուղղէ համայն հայութեան, որ զօրակցին անոր, իր կրած այս անարդարութեան դիմաց։ Հայկական Վերածնունդի Փարիզի մասնաճիւղը նաեւ կը քաջալերէ Նորվան Արքեպիսկոպոսը, որ վերատեսութեան ենթարկէ իր հրաժարականի որոշումը եւ շարունակէ իր ջանքերը ի նպաստ առողջ եւ համերաշխ փոխյարաբերութիւններու հաստատման Մայր Աթոռին եւ Սփիւռքի եկեղեցական մարմիններուն միջեւ, ի խնդիր Հայ ժողովուրդի գերագոյն շահերուն։ Հայկական Վերածնունդ-Փարիզ 08/07/2013 Email : zartonk75@free.fr ; Téléphone : 07 81 25 45 98 ; Page de Facebook : Renaissance Arménienne Paris перепечатано в Юсисапайле
|