АРМИНФОЦЕНТР: ԵԽԽՎ ամբիոնից բարձրացվեց հայերի պատմական հայրենիքի վերադարձի հարցը ԵԽԽՎ ամառային նստաշրջանի լիագումար նիստի ընթացքում, երբ քննարկվում էր իրավիճակը Մերձավոր Արևելքում, ելույթով հանդես եկավ Հայաստանի պատվիրակության անդամ Զարուհի Փոստանջյանը: Նա բարձրացրեց սիրիահայերի խնդիրը: Զ. Փոստանջյանը ԵԽԽՎ ամբիոնից մասնավորապես ասաց հետևյալը. «Քանի դեռ Սիրիայում պատերազմն ընթացքի մեջ է, պետք է բոլոր ջանքերը գործադրել օգնել Սիրիայի հայկական համայնքին գոյատևել այս դժվար օրերին: Սիրիահայերի համար այսօր ամենակարևորը մարդասիրական օգնությունն է, ինչպես նաև անհրաժեշտ է ցանկություն կանխել Սիրիայի պատմական հայ համայնքի ամբողջությամբ կազմալուծումը: Հակառակ դեպքում Սիրիայի հայ համայնքի կազմալուծումը կարող է վնասակար ազդեցություն ունենալ ինչպես Սիրիայի, այնպես էլ Մերձավոր Արևելքի մշակութային ժառանգության վրա»: Զ. Փոստանջյանը շարունակելով խոսքը` փաստեց, որ հայերը Սիրիայում հաստատվել են Արևմտյան Հայաստանից բռնի տեղահանվելու հետևանքով, մասնավորապես բռնագաղթել են Կիլիկիայից, որը շրջափակվել էր Թուրքիայի կողմից: Տիկին Փոստանջյանը կարևորեց հայերի` Սիրիայում ապրել շարունակելու փաստը ու հայտարարեց. «Սիրիահայերն իրենց հայրենիք` Արևմտյան Հայաստան և Կիլիկիա նահանջելու տեղ չունեն, քանի որ այդ տարածքներն այժմ գտնվում են Թուրքիայի տիրապետության ներքո: Սիրիայում կայունությունն այլևս վերահսկողությունից դուրս է: Ուստի ինքնապաշտպանական նպատակներով անհատական և խմբակային իրավունքների պաշտպանությունը հայերի համար միակ հիմնական ճանապարհն է վերադարձնել պատմական հայրենիքը` Արևմտյան Հայաստանն ու Կիլիկիան»: Տաթև ՀԱՐՈՒԹՅՈՒՆՅԱՆ Источник: Aravot.am
|