АРМИНФОЦЕНТР: ԱՄՆ Ներկայացուցիչների պալատի արտաքին հարաբերությունների հանձնախումբը մտահոգված է սիրիահայերի անվտանգությամբ ԱՄՆ Կոնգրեսի Ներկայացուցիչների պալատի արտաքին հարաբերությունների հանձնախմբի հանրապետական և դեմոկրատ անդամները միացել են հանձնախմբի նախագահ Քրիս Սմիթին՝ իրենց մտահոգությունը հայտնելով Սիրիայում բնակվող հայերի, մյուս քրիստոնյաների և այլ կրոնական փոքրամասնությունների անվտանգության վերաբերյալ։ Այս մասին տեղեկացնում է ԱՄՆ-ի Հայ դատի հանձնախմբի գրասենյակը (ANCA)։ ANCA-ի գործադիր տնօրեն Արամ Համբարյանը հատուկ շնորհակալություն է հայտնել Սմիթին և մյուսներին Սիրիայի կրոնական փոքրամասնությունների անչափ կարևոր հարցը նման մակարդակով բարձրացնելու համար։ Նա, մասնավորապես, իր երախտագիտությունն է հայտնել Սմիթին այն բանի համար, որ վերջինս պաշտոնապես դիմել է նախագահ Բարաք Օբամայի աշխատակազմին, որպեսզի Սպիտակ տունը Կոնգրեսի հետ ներկայացնի այն քայլերը, որոնք կառավարությունը ձեռնարկել է սիրիաբնակ, ինչպես նաև հակամարտության հետևանքով այնտեղից արտագաղթած հայերին համապատասխան օգնություն տրամադրելու ուղղությամբ։ Սմիթի կազմակերպած լսմանը, որը կրել է «Սիրիայի կրոնական փոքրամասնությունները. Մերձավոր Արևելքի թակարդում», մասնակցել են Պետդեպարտամենտի մարդու իրավունքների հարցերով մի շարք պաշտոնյաներ և հասարակական այլ կազմակերպությունների ներկայացուցիչներ։ Միջոցառման շրջանակներում առանցքային ուշադրություն է հատկացվել սիրիաբնակ հայերի խնդիրներին։ Մասնավորապես, Սմիթը հետաքրքրվել է, թե Օբամայի աշխատակազմն ինչ միջոցներ է ձեռնարկել օգնելու համար այն հայերին, ովքեր փախել են Սիրիայից։ Պաշտոնյաներից մեկը՝ Թոմաս օ. Մելիան, պատասխանել է, որ իրենք մշտական կապի մեջ են հայկական համայնքի և եկեղեցու ղեկավարների հետ, սակայն այս հարցի շուրջ ավելի մանրամասն ու սպառիչ պատասխաններ կներկայացնեն ավելի ուշ։ Հանդիպման ընթացքում ՄԱԿ-ի Մարդու իրավունքների հարցերով հանձնաժողովի ներկայացուցիչ Նինա Շեան ընդգծել է, որ Սիրիայում բնակվող քրիստոնյաները, այդ թվում նաև հայերը, այժմ վտանգի տակ են գտնվում։ Նա նշել է, որ Սիրիայի քրիստոնյաները, ի տարբերություն ալևիների, շիաների ու սուննիների, պաշտպան չունեն։ Իսկ միջոցառման մասնակից, հասարակական գործիչ Ջոն Էյբներն էլ իր հերթին ուշագրավ զուգահեռներ է անցկացրել սիրիական հակամարտության և 20-րդ դարասկզբի Օսմանյան կայսրությունում ժողովրդավարական բարեփոխումներ անելու շրջանի միջև։
«Ետ նայելով Օսմանյան կասրության այն օրերին, երբ 1908թ. տեղի ունեցավ մեծ հեղափոխությունը, որը կարելի է կոչել «Օսմանյան գարուն», կարելի է վերհիշել, որ բոլոր էթնիկ ու կրոնական փոքրամասնությունները պարում էին փողոցներում՝ տոնելով ազատությունը։ Սակայն մեկ տասնամյակ էլ չանցավ, երբ տեղի ունեցավ ցեղասպանությունը, և ամբողջ Անատոլիան մաքրվեց կրոնական փոքրամասնություններից։ Նույնը կարող է տեղի ունենալ այսօր, այս տարի կամ էլ հաջորդ, ուստի ԱՄՆ-ն միջազգային պարտավորություն ունի կանխել այդ ցեղասպանությունը»,-ասել է Էյբները։ Источник: Tert.am
|