АРМИНФОЦЕНТР: V-й Национальный съезд армян Западной Армении Тигран Пашабезян: Правительство Западной Армении в изгнании - действительность и двухлетняя деятельность. Ողջունում եմ Արեւմտյան Հայաստանի Ազգային Խորհրդի 5-րդ վեհաժողովի մասնակիցներին, գործընկերներին, հյուրերին, կազմակերպիչներին: Բոլորին մաղթում եմ քաջառողջություն եւ շատ արդյունավետ աշխատանք: Մեր առաջին զեկույցը վերնագրել ենք՝ "Արեւմտյան Հայաստանի Վտարանդի Կառավարություն - իրողությունը եւ երկամյա գործունեությունը" Եվ այսպես նախ իրողությունը Արեւմտյան Հայաստանի Վտարանդի Կառավարության իրողությունը, այլ կերպ ասած՝ սկզբնավորումը, թելադրված է մի քանի հիմնարար պատճառներով ու հրամայականներով: Նշենք դրանցից մի քանիսը. -1920 թվականի օգոստոսի 10-ին կնքված եւ 1920 թվականի նոյեմբերի 22-ին ԱՄՆ 28-րդ նախագահ Վուդրո Վիլսոնի կայացրած Իրավարար վճռով մասնակի լուծում է տրվել Հայկական Հարցին, որը սակայն նույնպես չի իրականացվել մինչեւ այսօր: -Դա իր հերթին նշանակում է, որ Միջազգային ընկերակցությունը 90 տարի ի վեր իրականում շրջանցել է հայության ազգային – պետական իրավունքները իր բնօրրան հայրենիքի նկատմամբ: -Նորանկախ Հայաստանի Հանրապետության ներկայի փաստացի իրողությունը հույս չի ներշնչում, թե տեսանելի ապագայում Հայաստանի Հանրապետությունը իրական հնարավորություն կունենա հետապնդելու Հայկական Հարցի վերջնական հանգուցալուծումը: -Հայկական Հարցի հետապնդման խնդիրների վրա անմիջական ազդեցություն են ունենում Միջին Արեւելքում տեղի ունեցող ժամանակակից ռազմա-քաղաքական զարգացումներն ու իրադարձությունները։ Ահա թե ինչու՝ Արեւմտյան Հայստանի Ազգային Խորհուրդը՝ հիմնված Շուշի 2004 թվականի դեկտեմբերի 17-ին, 2011 թվականի փետրվարի 4-ին հաստատակամորեն որոշեց ընթանալ Արեւմտյան Հայաստանի Վտարանդի Կառավարություն կազմելու ազգային – պետական ճանապարհով՝ պատշաճ կերպով պաշտպանելու համար Արեւմտյան Հայաստանի հայերի իրավունքները ինքնության պահպանման, սեփական ճակատագիրը տնօրինելու, բնական եւ անօտարելի իրավունքները բնօրրան հայրենիքի նկատմամբ իրականացնելու համար: Դա հնարավոր չէ իրականացնել առանց նոր ազգային – պետական ձեւաչափի, այս դեպքում՝ առանց Արեւմտյան Հայաստանի Վտարանդի Կառավարության կազմության ու գործունեության: Արեւմտյան Հայաստանի Ազգային Խորհուրդը, Արեւմտյան Հայաստանի Վտարանդի Կառավարությունը ընտրել է իրավական ուղիներով ընթանալու եւ երկու խնդիր լուծելու ճանապարհը: Առաջինը, իրավական բոլոր միջոցներով հայության բոլոր իրավունքների եւ, առաջին հերթին, Հայաստանի տարածքային ամբողջականության պահանջների պաշտպանության խնդիրն է։ Երկրորդը, հայությանն ու Հայաստանին ուղղված մարտահրավերներն ու սպառնալիքները չեզոքացնելու խնդիրը։ Առաջինը հնարավոր է, եթե հայությունը՝ այս դեպքում Արեւմտյան Հայաստանի հայը հանդես գա որպես իրավունքի սուբյեկտ, որպես բնիկ ժողովուրդ, ով իրավունք ունի իր բնօրրան հայրենիքում ինքնորոշման իրավունքի, ընդհուպ մինչեւ անկախություն։ Ով իրավունք ունի իր հայրենիքի նկատմամբ իր մասով, որպես իրավահաջորդ վիլսոնյան իրավարար վճռի, ով իրավունք ունի իր հայրենիքի նկատմամբ, որպես Կիլիկյան Հայաստանի անկախության պահանջատեր իրավահաջորդ: Երկրորդը, հնարավոր է, եթե հատկապես Միջին Արեւելքում գտնվող հայությունը, օգտվելով բնական եւ մարդկային իրավունքի սկզբունքներից ու նորմերից, օգտվելով Արեւմտյան Հայաստանի Ազգային Խորհրդի եւ Արեւմտյան Հայաստանի Վտարանդի Կառավարության կայացրած Մշտական, զինված, դրական չեզոքության մասին որոշումից /29, մարտ, 2011 թ./ ձեռնարկի իր ինքնապաշտպանության ուժերի կազմավորումը։ Ամփոփելով արդեն իսկ ասվածը՝ նշենք, որ Արեւմտյան Հայաստանի հայության եւ Արեւմտյան Հայաստանի իրավունքները պաշտպանելու այլ ճանապարհ չկա, քան Արեւմտյան Հայաստանի Կառավարության ձեւաչափը, որովհետեւ մնացած հասարակական – քաղաքական ձեւաչափերը բազմիցս ապարդյուն փորձարկվել են անցնող 90 եւ ավելի տարիների ընթացքում: Երկամյա գործունեությունը Այժմ խոսենք անցած երկու տարիներին Արեւմտյան Հայաստանի Ազգային Խորհրդի եւ Արեւմտյան Հայաստանի Վտարանդի Կառավարության իրականացրած ծրագրային աշխատանքների մասին: Արդեն նշել ենք, որ 2011 թվականի փետրվարի 4-ին Արեւմտյան Հայաստանի Հայերի Ազգային Խորհուրդը հռչակեց Արեւմտյան Հայաստանի Վտարանդի Կառավարության կազմության սկիզբը: 2011 թվականի մարտի 6-ին Արեւմտյան Հայաստանի Ազգային Խորհրդի հատուկ հրամանագրով ստեղծվել է Արեւմտյան Հայաստանի Ժառանգության ազգային հանձնախումբը: 2011 թվականի մարտի 30-ին Արեւմտյան Հայաստանի Ազգային Խորհուրդը որոշում կայացրեց Արեւմտյան Հայաստանի հայերի եւ Արեւմտյան Հայաստանի Մշտական, զինված, դրական չեզոքությունը հայտարարելու մասին։ 2011 թվականի ապրիլի 14-ին Արեւմտյան Հայաստանի Ազգային Խորհուրդը եւ Արեւմտյան Հայաստանի Վտարանդի Կառավարությունը դիմեց Սեւրի դաշնագիրը ստորագրած պետություններին՝ իր մասով իրավահաջորդության դիմումով։ 2011 թվականի մայիսի 28-ին Արեւմտյան Հայաստանի Ազգային Խորհուրդը որոշում կայացրեց Հայերի ցեղասպանության, Մեծ Եղեռնի հանցագործության իրականությունը հիմնավորելու Իրավաբանական հատուկ հանձնաժողովի ստեղծման վերաբերյալ: 2011 թվականի սեպտեմբերի 4-ին Արեւմտյան Հայաստանի Ազգային Խորհուրդը եւ Արեւմտյան Հայաստանի Վտարանդի Կառավարությունը դիմեց ՄԱԿ-ի Անվտանգության Խորհրդին՝ Վուդրո Վիլսոնի Իրավարար վճիռը վերստին կյանքի կոչելու դիմումով։ 2011 թվականի սեպտեմբերի 13-ին Արեւմտյան Հայաստանի Ազգային Խորհուրդը եւ Արեւմտյան Հայաստանի Վտարանդի Կառավարությունը դիմեց Եվրոպառլամենտի պատգամավորներին 1987 թվականի հունիսի 18-ին ընդունված <<Հայկական հարցի քաղաքական լուծման մասին>> բանաձեւի որոշ դրույթներ վերանայելու եւ վերաձեւակերպելու դիմումով։ 2011 թվականի հոկտեմբերի 6-ին Արեւմտյան Հայաստանի Ազգային Խորհուրդը եւ Արեւմտյան Հայաստանի Վտարանդի Կառավարութիւնը ձեռնարկեց համաժողովրդական էլեկտրոնային հարցապնդում՝ հետեւյալ երկու ծրագրային խնդիրներով` 1. Վիլսոնեան Իրավարար վճռի իրականացման ծրագիր, 2. Արեւմտյան Հայաստանի Վտարանդի Կառավարության Խորհրդարանական ընտրությունների ծրագիր։ 2011 թվականի հոկտեմբերի 21-ին Արեւմտյան Հայաստանի Ազգային Խորհրդի նախագահի հատուկ հրամանագրով կյանքի կոչվեց Արեւմտյան Հայաստանի Դրոշը: 2011 թվականի դեկտեմբերի 26-ին Արեւմտյան Հայաստանի Ազգային Խորհրդի նախագահի հատուկ հրամանագրով հայտարարվեց Արեւմտյան Հայաստանի հայերի ինքնապաշտպանության եւ անվտանգության ապահովման ազգային համակարգի ստեղծման գործընթացի սկիզբը:
2012 թվականը շրջադարձային է հայությանն ու Հայաստանին ուղղված ահագնացող մարտահրավերների ու սպառնալիքների իմաստով: Միջին Արեւելքում սկիզբ առած Արաբական գարունը հասավ նաեւ Սիրիա վտանգելով տեղի հայ գաղթավայրի անդորրն ու բնականոն կենսագործունեությունը:
Չափազանցած չենք լինի, եթե ասենք, որ այդ իմաստով 2012 թվականի փետրվարը ամենավճռական հանգրվանը եղավ Արեւմտյան Հայաստանի Ազգային Խորհրդի եւ Արեւմտյան Հայաստանի Վտարանդի Կառավարության գործունեությունը մի նոր վճռական հուն ուղղորդելու համար:
Ընդհանուրին համակած անորոշության, երբեմն հուսահատության հասնող համընդհանուր հենքի վրա Արեւմտյան Հայաստանի Վտարանդի Կառավարությունը հիմնվելով Արեւմտյան Հայաստանի Ազգային Խորհրդի եւ նրա նախագահ Արմենակ Աբրահամյանի խորհրդատվության ու աջակցության վրա՝ հայտարարեց Միջին Արեւելքի հայության, այդ թվում՝ Սիրիայի հայության իրավական - քաղաքական միակ ճիշտ կողմնորոշման մասին, այն մասին, որ Միջին Արեւելքի հայությունը այլեւս նահանջելու այլ տեղ չունի, այլեւս գնալու այլ տեղ չունի բացի բնօրրան հայրենիքից՝ Արեւմտյան Հայաստանից եւ Կիլիկյան Հայաստանից:
2012 թվականի գործունեությունը, անշուշտ այլ աշխատանքների իրականացմանը զուգընթաց, ինչի մասին կզեկուցեն մեր հարգարժան գործընկերները, հիմնականում նպատակաուղղվեց Սիրիայի հայության իրավունքների պաշտպանության գործին: Բայց այդ եւ այլ խնդիրների մասին ավելի հանգամանալի մեր երկրորդ զեկույցում, որը վերնագրված է՝ <<Հայությանն ու Հայաստանին նետված ժամանակակից մարտահրավերները, Սիրիայի հայության իրավունքները եւ ինքնապաշտպանության իրավունքը, Արեւմտյան Հայաստանի Վտարանդի Կառավարության ապագայի ծրագրերը>>: Այդ ելույթը կներկայացվի վաղվա նիստին, Երեւանի ժամանակով ժամը 20:00-ին:
Խորին շնորհակալություն հայտնելով մեր գործընկերներին, համակիրներին, հյուրերին, Արեւմտյան Հայաստանի քաղաքացիներին, Արեւմտյան Հայաստանի հայերի իրավունքների պաշտպանությանը լծված բոլոր նվիրյալներին՝ հատուկ նշենք, որ՝
մենք միասին ենք եւ հաղթանակը մերն է լինելու:
Շնորհակալություն բոլորիդ:
Արեւմտյան Հայաստանի Վտարանդի Կառավարության Վարչապետ`
Տիգրան Փաշաբեզյան
30.11.2012 թ.
|